شابة في العشرينات من عمرها تقريبا قادمة من الصعيد في زيارة لاهلها تقريبا ويبدو من كلامها انه غير متعلمة او تعليمها بسيط .. تنتقي حبيبات الطماطم من البائع .. اسألها عن سعر الطماطم
تخبرني بانه 3 جنيه للكيلو .. فيصعق البائع ويخبرني انها ب 5 جنيه
ترد علي:سيبك منه هي 3 جنيه حلو اوي ويبوس ايده وش وضهر :)
يتبادلون الشد والجذب في الحديث
ثم تعلن الشابة انه علينا ان نمتنع عن شراء الخضروات المبالغ في اسعارها حتي تفسد عند البائع وساعتها غصب عنهم يرخصوها
تصدمني عبارتها وانظر اليها صامته اتابع حديثها
تشاركها سيدة اخري الحديث لتخبرها:ما نشتريش ازاي بس يعني نموت من الجوع
ترد عليها بكل قوة احنا نقدر نصبر علي الاكل يومين انما هما خضارهم حيبوظ ومش حيتحمل يومين
يرد البائع وانا ذنبي ايه؟؟؟ماهو انا زيي زيكم السعر غالي عليا
ترد عليه: وانا مالي؟؟انت اللي بتبيع لي
خلي الحاجة تبوظ عندك ولما تخسر تبقي تعرف تروح للي بيجبلك الحاجة غالية وتقوله مش حشتري منك
انما طول ما احنا بنشتري عادي مفيش حاجة جتتغير!!!!!!!!!!!!!!
لا اتذكر اني تحدثت كثيرا او علقت لا اتذكر
ولكني اتذكر اني كنت في حالة انبهار شديد بتلك الشابة الصغيرة
ايه الجمال ده
رغم كم الانتقادات التي وجهت للثورة والتعثرات التي صاحبت طريقها الا انها دون ان يدركوا قد خلقت وعيا في وجدان الناس
حتي ان اعلنوا رفضهم لها الا ان نفوسهم قد تشربت بروحها
تحية لهؤلاء من القوا بهذا الحجر الصغير فحدث هذا التغيير
تحية لهؤلاء من استجابوا لها…فتغيروا
بقلم – Mirh Mirh
