أخبار عاجلةثقافة
المستحيل .. شعر رحاب محمد
أنا ليه بشوفك وسط الفصول
زي الخريف
ورقك ضعيف
وانا قلبي شَب
وقال يخطي ع الوجع
يفتح شبابيك القمر
يلقي القمر مجروح حزين
كان نفسه يقرا السهرانين
يرسم غناهم ف السحر
تقوي النجوم
بس القمر … لساه حزين
السهرانين مبقوش يخطوا
ع الوجع
عاشوا الأنين ويا الدموع
متحنطين
وأنا قلبي شَب
وقام مخطي
قال هعدي
هرمي نص الذكريات فوق الرصيف
واطلع هناك ….
فوق ف السما …… جنب القمر
هعشق حكاوي الليل معاه
واما يطلع فجر تاني
هازرع الورد ف نداه
وأفرش طريق الحلم نور
مش مستحيل
وان جتلي تاني
في يوم حزين
هقلب نجوم الليل شموس
تقرالك اللحن الجميل
مش مستحيل
المستحيل اني اكون
عايشة الخريف
وانا قلبي عاشق للربيع
ده المستحيل
