مات اللى مات والباقى مقتول م السكات

مات الولاد
والولوله ماليه الشاشات
والحزن ساكن ف البيوت
مانموت ياسيدنا كلنا
كدا أو كدا راح يوم نموت
ف بلاش نقضّيها حكايات
مات اللى مات
والباقى مقتول م السكات

*****************

يا عمنا والنحنحه بتخرب بلاد
بيضيع كدا زينة الشباب
يا عمنا ..

ساكت عشان خايف من اللى بيسكنوا
بهو الشاشات…
خايف من اللى بيقبضوا علشان قانون
ما هوش برئ
أو واد خنافس ابن أُمُّه
نفسه يصبح يوم جرئ

يا عمنا وحياة ولادك
شوف شبابك اللى راح
واللى واقف ف الطابور
فى الإنتظار
يا عمنا خليك جدع
من نفسنا عاوزين قرار

*****************

ياسْيدنا كام من بيت بكى
ولا يوم شكى
مستنيين حلمك يصير
ياسيدنا بيت جندك خشب
وسلاحه مصنوع من حصير
وسلاحه يا ابنى إحتسب
نفسك شهيد
وايمانه إنّه راح يعود تانى لأبوه
ياسيدنا ليه بتضيعوه
ولِدك رخيص يا ام البطل
مهما حصل
هايموت ونبعت له أخوه

*****************

يانخبة الهمّ استريحوا وريّحوا
يا سَدنِة الدمّ الأمان
ياسيدنا ما كفايه امتهان
خليك دكر وعليها دوس
شيل القناع من ع الوشوش
سيبك بقى م النحنحه
اضرب بروجى الصحصحه
ياسيدنا لجل الله حرام
و بلاش أمور المرْجَحه
كرّهت فينا المشرحه !!!

بياع الفل

ابوالمجد البحيري