عيون فلاحة مصرية .. ثروت أنجلوس

بقلم – ثروت أنجليوس

هى عيونك سارحة لفين؟
وإيه منتظرة!!!
و الحلقين تحت الودنين
حمل تقيل
طب وحياة رب القدرة
كل مافيكى حلو جميل
مروى بمى وطمى النيل
وللا التوب!!!
اللى فى بدنك دايب دوب
والألوان
الألوان زاهية ومنتصره
ولا البستان
راسم الحلم لمليون بكرة
وللا شفايفك!!!!!
غمرت كل الكون بمعارفك
حاضنة الحب وحامله الفكرة
وبكره
بكره يهون وبعده يهون
بكره نغنى على الأرغول
مصريا أمى حلوة ياسمرا
بكره أهو جاى
جاى وراجعلك ابنك
راجع.
شايل غصن زيتون
وبكره يعدى وبعده يعدى
ومركب غم يغور مايهدى
بكره يامصر وسط الكون
هاتغنى
أنا مين قدى انا مين قدى

• من ديوان  :إياك ولحظة سكوت