حقيقة سارة التي أشعلت الفيس بوك؟
على فيس بوك ظهرت بوستات كتيرة بتتكلم عن بنت اسمها سارة والكل بيسال نفسه هي مين سارة وايه قصتها؟
والحقيقة انا برضو فكرت بنفس الطريقة بس قلت اكون ايجابي وادور على سارة وعملت بحث في جوجل عن سارة وكانت النتائج مذهلة طبعا اول سارة يعرفها التاريخ والبشرية هي السيدة سارة زوجة خليل الله ابراهيم عليه السلام لكن مش هي المقصودة طبعا من الكلام دا.
واليكم عدد من نتائج البحث .. كان في واحد عامل صورة فوتوشوب وشه طالع من وردة وكاتب بحبك يا سارة بس ادي الموضوع يا ستي طبعا الناس مسدقت وهتك يا تريقة.
اما الشيخ محمود شعبان صاحب ايفيه “هاتوا لي راجل” ظهرت بوستات كتيرة على فيس بوك بتصوره وهو بيقول هاتوا لي سارة وطبعا جابوا له سارة أكيد.
ناس تانية قالت ان سارة دي هي البنت اللي كان الرئيس مبارك بيشاور لها بايده وهو في القفص داخل جلسة المحاكمة امبارح وطبعا محدش شاف الرئيس بيشاور لمين.
واحدة تانية اسمها سارة عملت يافتة كبيرة وعلقتها ع البلكونة وكتب عليها زوجي العزيز كل عيد زواج وانا معاك اسعد انسانة في الكون … زوجتك سارة وبرضو محدش يعرف هي ساكنة فين.
في جميع الأحوال سارة ممكن تكون كذبة أبريل أو خدعة من النظام عشان الناس تنسى طوابير العيش والبنزين والسولار وغلاء المعيشة وتنشغل في البحث عن سارة.
