أنا مش شاعر !!
بقلم – مجدي البحيري
أيــوه أنا مش شاعر
أنا كلمة من وجع غربة وطن
وإحتياجى لضمته
باطلعها ف يحس بيها صاحبى
اللى قاعد بيمسح دمعته
بعد مكالمة حب
بينه وبين أمه
لما تقول له ارجع بقا وحشتنا
وأب بيكلم ابنه وبيقوله
انت قولت لى من شهور
إنك يادوب كام يوم
حى تجيب لى طياره من المطــار
أقولك
ارجع بقااا أنا أصلاً مبحبش الطيران !!!
أنا مش شاعر !!
أنا بس حبيت لما أكون بكلم حبيبتى وبوصفها
أقولها يانسمة صبح بتهفهف من ستارة خفيفة
فى جنينة كلها أزهار
ولا أأقولها تصدقى ضحكتك دى تشبه الاعصار
غضبك ده يشبه الفوران !!
ولا ممكن أطمع شويتين واقولها
ياحلم خايف أمسكه يعود الغريب لــ غربته
ولا يعرف انه كان فرحان
وألا يصحى من حلم شاف فيه
انها بتضم ايده وبتقوله وحشتنى !!!
ولما أقول لها ايوه
انا بحبك
أناديها مثلا ياورده فى البستان
أنا مش شاعر !!!
أنا فرحه بتيجى فى بالى
بسبب أو بدون سبب
تشوفنى بنادى بأعلى صوتى
وبقول أنا فرحان
ممكن يكون فيه واحد بيحبنى
ويقولى ربى يفرحك
افرح,, افرح مانت كمان انسان !!!
أنا مش شاعر !!
أنا بس حبيت
انى أقولك أنا من صغرى أمتلك
بيت وعربيه وطياره
أى نعم البيت” طين”
والطياره” ورق”
والعربيه” بحجارة “
لكن فى نظرى انا يسووا
فدانين وفيلا وعماره !!
أنا مش شاعر !!
أنا مش شاعر ولا بعرف
ارتجل ولا انظم قوافى للأبيات
بقا أنا أبنى بإيدى من الحروف أبيات؟
وولا أجمع كم كلمه فى قصيده تسميها وطن ؟
وانا اصلا محروم من بسمة وطن دافى ؟؟
أنا بس كل اللى بطلبه حبة هواء صافى
انى آخد نفس هادى
واقول يا
رب أو ممكن حابب بس لما أصرخ واقول آآآه
تعرف بقولها من فرحتى ولا من كسر جوايه
.
أنا مش شاعر
مطالب لما اكتب أعبر واطلع أحلى ماجوايه
انا بس كل اللى بطلبه انى لما اقول كلمتى الحزينه
حد يقولى متخافش انت كمان زيى
فى قصتى شريك معايه!
عرفت ليه أنا مش شاعـر ؟
